|
Pressemelding
Norske toppartistar til Førdefestivalen
Tapt kjærleik og bitre tårer, leik med
tyngdekrafta og halsbrekkande stunt, 150 år gamle coverlåtar frå dei sju
hav – dette er stikkorda for nokre av konsertane som norske artistar står
for på årets Førdefestival.
Førde
Internasjonale Folkemusikkfestival kjem til å koke av franske kjensler i
sommar, men festivalen kan også dette året presentere nokre av dei aller
fremste norske folkemusikarane på programmet. Festivaldirektør Hilde
Bjørkum seier festivalen har eit ansvar for å formidle den norske
folkemusikken til eit stort publikum, og gler seg over eit norsk program
med stort mangfald.
Profilerte artistar
Storm Weather Shanty Choir
frå Stord
kjem til Førde med ramsalte sjantiar og 150 år gamle coverlåtar frå dei
sju hav! - Desse staute karane syng med slik kraft og energi at du
garantert vil få bakoversveis! Dei har ei fantastisk evne til å inkludere
publikummet i konsertane sine, fortel ei entusiastisk Bjørkum.
Den
allsidige folkesongaren
Unni
Løvlid
frå Hornindal vitjar denne gongen festivalen saman med den kritikarroste
pianisten
Liv
Glaser.
Som ein del av minnemarkeringa etter Edvard Grieg, vil dei presentere eit
konsertprogram med utgangspunkt i Griegs "Norske Folkeviser opus 66",
"Haugtussa" og "Lyriske stykker".
- Grieg var ein av dei første i Norge som tok folkemusikken inn i
kunstmusikken, og for mange har Grieg sine komposisjonar vore deira første
møte med den norske folkemusikken.
Tett på
- Gjennom konsertserien "Tett på" får publikum ein heilt unik sjanse til å
møte nokre av dei fremste norske artistane i ei lite og intimt format,
seier Bjørkum.
Valdresduoen
Mattisgard & Røine
byr på pasjonerte og grovkorna tolkingar av balladar, skillingsviser og
slåttestev, og vil gje publikum eit heilt uforgløymeleg møte med
forferdeleg triste songar, tapt kjærleik og bitre tårer. – Inspirasjon frå
både amerikansk old time music og den norske folkemusikken ligg til grunn
for det musikalske uttrykket til denne spennande duoen.
Anne
Hytta
frå Telemark er ein av dagens fremste unge hardingfelespelarar, og vann
Folkelarmprisen 2006 for debutplata "dag, kveld, natt". - Ho har funne
sitt personlege uttrykk når ho tolkar og formidlar slåttar frå Telemark.
Kreativitet og teft for detaljar gjer at ho skaper ein rik
stemningsvariasjon.
Premiere på tre forestillingar
Dansekompaniet FRIKAR kjem til Førde med ei forrykande forestilling der
seks av Norges sprekaste lausdansarar leikar med tyngdekrafta og ikkje
kvir seg for å utføre halsbrekkande stunt.
'KRUK!'
er Dansekompaniet si andre oppsetjing, og forestillinga har Norgespremiere
på festivalen.
- Under denne forestillinga må eg nok halde meg fast i stolen, ler
Bjørkum. - For dei akrobatiske sprella desse dansarane utfører er ikkje
kvardagskost, og absolutt ikkje noko du bør prøve heime!
Sigrid Moldestad har nypremiere på si sjølvskrivne
"TAUS".
Forestilinga tek utgangspunkt i historia om ei rekkje kvinnelege spelemenn
frå Nordfjord og Sunnmøre heilt tilbake til 1700-talet.
Suksessforestillinga hadde premiere i Bergen denne våren, og forestillinga
på festivalen er den første i fylket.
– Frie kvinner som drog på speleferd med ungane på slep, ja dette er
sterke historier. Og likefullt dagsaktuelle historier. For det fins enno
stader og kulturar i verda der kvinner ikkje får sjansen til å uttrykkje
seg.
Oppsetjinga av teaterstykket
"Rekneprinsen"
av forfattaren Erna Osland frå Høyanger, er eit nytt samarbeid mellom
festivalen, Sogn og Fjordane Teater og Sogn og Fjordane fylkeskommune. - Å
bruke folkedans og -musikk som ein integrert del av teater skapar eit nytt
og annleis scenisk uttrykk. Festivalen har dei siste åra hatt fleire slike
produksjonar, og det er alltid like spennande å sjå resultatet, fortel
Bjørkum.
Musikk for den danseglade
Festivalen har også nokre av landets
fremste dansespelemenn på programmet, og det er eit rikt og variert tilbod
til dei danseglade. Søndre Trondhjems Spellemannslag er ein livleg
gjeng som spelar svingande dansemusikk frå Trøndelag. Sigmund Eikås
og Joar Skorpen vil spele fengande danseslåttar frå Sunnfjord, og
trioen Hått vil på sin særeigne måte spele hardingfelerunddans frå
Telemark, Numedal og Valdres. – Danseskoa må på, for til slik musikk går
det ikkje å sitje stille, smiler Bjørkum. Og ønskjer velkomen til årets
festival!
For
meir informasjon, kontakt:
Direktør Hilde Bjørkum, mobil 909 19 933
Marknads- og informasjonssjef Torill Faleide, mobil 907 38 527
Førdefestivalen 5.-8. juli 2007: Émotions Françaises – franske
kjensler
Førdefestivalen er den største festivalen i Skandinavia for
folk/world/trad musikk. Kvart år presenterer festivalen rundt 250 artistar
frå heile verda gjennom 80 store og små konsertar og arrangement på fire
dagar.
Årets festival er den 18. i rekkja.
www.fordefestival.no
www.myspace.com/fordefestival
|